ہندوستان کی نابالغ بیوائیں

ہندوستان کی کم سن بیوائیں

(ڈیلی ایگل، ۲۷ فروری ۱۸۹۵ء)

سوامی وویکانند، ہندو راہب، نے پیر کی شب ہسٹاریکل ہال میں بروکلن ایتھیکل ایسوسی ایشن کے زیرِ اہتمام «دنیا کو ہندوستان کا عطیہ» کے موضوع پر خطاب کیا۔ جب سوامی اسٹیج پر تشریف لائے تو ہال میں تقریباً ڈھائی سو افراد موجود تھے۔ اِس موقع پر خاصی دلچسپی اِس وجہ سے پیدا ہوئی کہ بروکلن رامابائی سرکل کی صدر مسز جیمز میکین نے، جو ہندوستان میں مسیحی کام میں دلچسپی رکھتی ہیں، اُس بیان کی تردید کی تھی جو خطبے سے منسوب کیا گیا تھا کہ ہندوستان کی کم سن بیوائیں محفوظ نہیں رکھی جاتیں [بدسلوکی کا شکار ہوتی ہیں]۔ اپنے خطبے کے کسی حصے میں اُنھوں نے اِس تردید کا حوالہ نہ دیا، مگر جب وہ خطاب ختم کر چکے تو سامعین میں سے ایک شخص نے مقرر سے دریافت کیا کہ اُس بیان کے بارے میں اُن کے پاس کیا وضاحت ہے۔ سوامی وویکانند نے کہا کہ یہ بات غلط ہے کہ کم سن بیوائیں کسی بھی طور بدسلوکی یا ناروا برتاؤ کا نشانہ بنتی ہیں۔ اُنھوں نے مزید کہا:

«یہ ایک حقیقت ہے کہ بعض ہندو بہت کم عمری میں شادی کرتے ہیں۔ بعض اُس وقت شادی کرتے ہیں جب وہ مناسب عمر کو پہنچ چکے ہوتے ہیں اور بعض سرے سے شادی ہی نہیں کرتے۔ میرے دادا کی شادی اُس وقت ہوئی جب وہ بالکل بچے تھے۔ میرے والد کی شادی چودہ برس کی عمر میں ہوئی اور میری عمر تیس برس ہے اور ابھی تک میری شادی نہیں ہوئی۔ جب شوہر فوت ہو جاتا ہے تو اُس کا تمام مال و متاع اُس کی بیوہ کو منتقل ہو جاتا ہے۔ اگر کوئی بیوہ نادار ہو تو وہ بھی ویسی ہی ہوتی ہے جیسی کسی بھی دوسرے ملک کی نادار بیوائیں۔ بوڑھے مرد بعض اوقات بچیوں سے شادی کر لیتے ہیں، مگر اگر شوہر دولت مند ہو تو بیوہ کے لیے یہی بہتر ہوتا ہے کہ وہ جتنی جلد ممکن ہو فوت ہو جائے۔ میں نے پورے ہندوستان کا سفر کیا ہے، مگر مجھے اُس بدسلوکی کا کوئی واقعہ نظر نہیں آیا جس کا ذکر کیا جاتا ہے۔ ایک زمانے میں مذہبی جنونی عورتیں، بیوائیں، تھیں جو اپنے شوہر کی موت پر خود کو آگ میں جھونک دیتی تھیں اور شعلوں کی نذر ہو جاتی تھیں۔ ہندو اِس پر یقین نہیں رکھتے تھے، مگر اِسے روکتے بھی نہ تھے، اور یہ اُس وقت تک ختم نہ ہوا جب تک انگریزوں نے ہندوستان پر اپنا اقتدار حاصل نہ کر لیا اور بالآخر اِس کی ممانعت نہ کر دی۔ اِن عورتوں کو سنت سمجھا جاتا تھا اور بہت سے واقعات میں اُن کی یاد میں یادگاریں تعمیر کی گئیں۔»